** طقوس الدم **بقلم المبدع الأستاذ// مصطفى هلال//

 طقوس الدم

انا عربى منزوع الدسم
أو منتهى الصلاحية
من آمه غير الأمم
بتكافئ العصبية
انا عربى كله كلام
حتى الكلام ضدى
قوتى من الأحلام
والفعل غير ودى
ومالوش نصيب أسمى
من جملة فعلية
إن كان مانيش فاعل
لكن انفعل بيا

عليت مبانى العدا
واحنا بنانا اتهد
وكل حاكم بنا
فى وش اهله السد
واللى غرق ف البطش
يهرب لقاع البحر
يهدم بنا الطغيان
يهزم جيوش السحر
وبيهزم السفاح من
غير سلاح ف اليد
والخنجر اللى بيقتل
ف العربى أيد عربية
واحنا صديد جرحنا
بقى يعبد الدموية
الدنيا طالعة لفوق
واحنا طلعنا لتحت
الشعب عاش مسخرة
وحكومته راكبة اليخت
ماتقولش نخوة وجهاد
انت خلاص رحرحت
واللى بيقتل اخوه
ساعة مايسأل ضميره
بيقول ضميره
ارتحت
والحب لما اندبح
فى حرب أهلية
مشاعرنا تبقى رماد
مش بس منسية
حتى التفكير ف الجنس
رغبة تغير جنسية !
‫#‏مصطفى_هلال‬